दुर्लक्षाचा फायदा घेऊन पत्रा शेड मध्ये अनेकांना निवारा
पुणे: अतिक्रमणे हटवण्याबाबत भीम गर्जना करणाऱ्या महानगरपालिकेच्या अगदी जवळच भर चौकात शेडवजा अतिक्रमण झाले असून रस्ता वाहतूक पोलिसांच्या बॅरिकडने अडवून पत्र्याची खोली बांधण्यात आली आहे. अनेक वर्षांपासून तेथे परप्रांतीयांचे वास्तव्य आहे.
महानगरपालिका भवनापासून जुन्या तोफखान्याकडे जाणाऱ्या चौकातली ही परिस्थिती आहे. भर चौकात एका मंडळाचे पक्के बांधकाम असलेले देऊळ आहे. त्याच्या भिंतीचा आडोसा घेऊन लोखंडी बॅरिकेड्सनी ५ ते ६ फूट रुंदीचा रस्ता बंद करण्यात आला आहे. खेटून असलेल्या ताडी अड्ड्याच्या पत्र्याच्या आडोशाने चारही बाजूंनी पत्रे उभारुन एक मोठी खोली उभारण्यात आल्याचे स्थानिक नागरिकांनी सांगितले.
संबंधित मंडळाने घेतलेल्या नळावर चोवीस तास पाणी पुरवठा होतो. त्यामुळे पाण्याची सुविधा उपलब्ध आहे. समोरच नदीपात्रालगत सार्वजनिक स्वच्छतागृह आहे. पीएमपीएमएलचे मोठे स्थानक तेथे आहे. त्यामुळे महापालिका भवनाच्या नाकाजवळ बेकायदेशीर खोली बांधणाऱ्यांना सर्व सुविधा उपलब्ध असल्याने त्यांचे फावले आहे.
दरम्यान, महापालिका आयुक्त नवल किशोर राम यांच्या आदेशानुसार, शहरातील अतिक्रमण आणि बेकायदा बांधकामांवर महापालिकेकडून कारवाई केली जात आहे. मात्र, बांधकामांवर कारवाई करताना अनेकांची घरे पाडली जात आहेत. अगदी चार ते पाच मजल्याच्या इमारती पाडल्या जात आहेत. तथापि महापालिकेच्या नाकावर टिच्चून अनेक वर्षांपासून असलेली अशी अतिक्रमणे 'जैसे थे' असल्याने सार्वजनिक रस्ता अडवला जात आहे. तसेच वाहतूक पोलिसांच्या लोखंडी बॅरिकेड्सचाही अडथळा अतिक्रमणासाठी उपयोगी आणला जात आहे. वाहतूक पोलिसांकडील बॅरिकेड्सची संख्या आणि इतस्ततः पडलेले बॅरिकेड्स हा स्वतंत्र विषय आहे.