भाजपचे नीलेश कोंढाळकर, प्रियंका शेंडगे, विश्वास ननावरे, राजेंद्र काकडे, रवि साळेगावकर, जयप्रकाश पुरोहित आणि उदय लेले यांची स्वीकृत नगरसेवक पदी निवड निश्चित होणार असून राष्ट्रवादी काँग्रेसने माजी महापौर दत्तात्रय धनकवडे तसेच राकेश कामठे यांची स्वीकृत नगरसेवक म्हणून निवड निश्चित केली आहे. यापैकी पालिका निवडणुकीतून डावलण्यात आलेले उदय लेले यांना दुसऱ्यांदा स्वीकृत नगरसेवक पद मिळाले आहे. दत्ता धनकवडे यांचा सार्वत्रिक निवडणुकीत पराभव झाला होता.
चारशे जणांतून सात नाव निवडण्याचे मोठे आव्हान स्थानिक नेत्यांवर होते, त्यानुसार नावे निश्चित करण्यात आली आणि प्रदेश भाजपकडे पाठवण्यात आली. भाजपचे प्रदेशाध्यक्ष रवींद्र चव्हाण यांनी त्यांना मंजुरी देऊन सभागृह नेते गणेश बिडकर यांना संबंधितांची नावे पाठवली आहेत.
स्वीकृत नगरसेवकांची निवड करण्याचे अधिकार आयुक्तांना असतात. त्यामुळे अनेक इच्छुकांनी थेट महापालिका आयुक्तांकडे अर्ज सादर केले आहेत. आतापर्यंत सुमारे ८०० हून अधिक अर्ज आयुक्तांकडे प्राप्त झाल्याने अर्जाची छाननी करण्यासाठी निवडणूक विभागाने चार सदस्यांची समिती नियुक्त केली आहे.