धायरीत परांजपे बिल्डरला दणका

 माहिती अधिकारातून कारवाई

पुणे : धायरी येथील अभिरुची परांजपे स्कीम परिसरातील म्हाडाच्या सोसायट्यांमधील मैला मिश्रित सांडपाणी एसटीपी प्लांटमध्ये प्रक्रिया न करता जवळील सोसायटी परिसरात सोडले जात असल्याची बाब समोर आली. यामुळे परिसरातील रहिवाशांच्या आरोग्यास गंभीर धोका निर्माण झाला होता.या संदर्भात दक्ष नागरिक मंच यांनी पुणे महानगरपालिकेच्या सिंहगड रोड क्षेत्रीय कार्यालयातील सहाय्यक आयुक्तांकडे दिनांक १० सप्टेंबर २५ रोजी लेखी तक्रार केली होती.


तक्रारीवर कार्यवाही करण्यात दिरंगाई होत असल्याचे निदर्शनास आल्यानंतर मंचाचे समन्वयक सुरेश भाले यांनी २ फेब्रुवारी २६ रोजी जनमाहिती अधिकारी, सिंहगड रोड क्षेत्रीय कार्यालय यांच्याकडे माहिती अधिकाराखाली अर्ज दाखल केला.या अर्जाच्या अनुषंगाने दिनांक २ मार्च रोजी मिळालेल्या माहितीनुसार, संबंधित एसटीपी प्लांट अद्याप सोसायट्यांना हस्तांतरित करण्यात आलेला नसून त्याची देखभाल व व्यवस्थापनाची जबाबदारी अभिरुची परांजपे स्कीमच्या व्यवस्थापनाकडेच आहे, असे समजले.

सोसायट्यांमधील मैला मिश्रित सांडपाणी कोणतीही प्रक्रिया न करता बाहेर सोडून आरोग्यास घातक परिस्थिती निर्माण केल्याबद्दल पुणे महानगरपालिकेने संबंधित व्यवस्थापनास १ लाख दंड भरण्याचे आदेश दिले आहेत. 

दंड न भरल्यास महाराष्ट्र महानगरपालिका अधिनियम १९४९ अंतर्गत कलम चॅप्टर १४ नियम ३ (फ) नुसार प्रशासकीय कारवाई करण्यात येईल, अशी नोटीसही बजावण्यात आली आहे.दरम्यान, ज्या सोसायट्यांतील सदस्यांनी तक्रार केली होती त्यांच्याकडे चौकशी केली असता अद्यापही समस्येचे पूर्ण निराकरण झालेले नसल्याचे समोर आले आहे.