पुणे: जागतिक महिला दिनाचे औचित्य साधून पुणे बार असोसिएशनतर्फे सोमवारी शिवाजीनगर जिल्हा व सत्र न्यायालयातील अशोका हॉल येथे विविध उपक्रम आणि स्नेहसंमेलनाचे आयोजन करण्यात आले होते. स्त्री शक्तीचा जागर आणि महिला वकिलांच्या कर्तृत्वाचा सन्मान या कार्यक्रमाद्वारे करण्यात आला.
कार्यक्रमाच्या अध्यक्षस्थानी ज्येष्ठ अभिनेत्री मृणाल कुलकर्णी होत्या, तर मुख्य व्याख्यात्या म्हणून मुंबई उच्च न्यायालयाच्या निवृत्त न्यायमूर्ती शालिनी फणसळकर-जोशी उपस्थित होत्या.
दिवसाची सुरुवात महिला वकिलांसाठी आयोजित आरोग्य शिबिराने झाली, ज्यामध्ये अनेक वकिलांनी आपली आरोग्य तपासणी करून घेतली. त्यानंतर आयोजित 'काव्यरंग' या उपक्रमात महिला वकिलांनी आपल्या स्वरचित कविता सादर करून उपस्थितांची मने जिंकली.
पुणे बार असोसिएशन चे अध्यक्ष ॲड. राम भुजबळ यांनी कार्यक्रमाचे प्रास्ताविक केले. शालिनी फणसळकर-जोशी यांनी कायदेशीर क्षेत्रातील महिलांचे योगदान आणि आव्हाने या वर मार्गदर्शन केले. मृणाल कुलकर्णी यांनी स्त्रीत्वाचा सन्मान आणि सामाजिक जाणीवेवर भाष्य केले.
पुणे बार असोसिएशनचे उपाध्यक्ष ॲड. प्रताप मोरे, ॲड. प्रीतीसींग परदेशी, सचिव ॲड. सम्राट जांभूळकर, ॲड. अभिजित पोळ, ऑडिटर ॲड. शिवराज निंबाळकर,खजिंदार अंजली बांदल आणि कार्यकारिणी सदस्य ॲड. योगेश जैन ॲड. प्रितेश दळवी आदी व्यासपीठावर होते.
ॲड.प्रियंका घाडगे व ॲड.स्मिता वाघमारे यांनी प्रमुख उपस्थित पाहुणे यांची ओळख करुन दिली. सूत्रसंचालन ॲड .नेहा जांभळे व ॲड.गुंजन भोसले यांनी केले. आभार ॲड.पूजा पवार व ॲड.शीतल देशमुख यांनी मानले.
